Тарт з ласосем і шпінатам

Ён жа кіш, ён жа адкрыты французскі пірог

Вельмі люблю пясочнае цеста і ўсе варыяцыі пірагоў з яго ўдзелам, асабліва тарты. Адкрытыя пірагі такога тыпу - цудоўны варыянт ланчу, абеду ці нават вячэры, а што яшчэ прыемней - смакуюць выдатна як у цёплым, так і ў халодным відзе. А ад спалучэння ласося са шпінатам у выглядзе пірага не могуць адмовіцца нават перакананыя мясаеды. Дарэчы, калі ласося пад рукой няма, то можна зрабіць такі пірог проста са шпінатам (даць яго больш) ці нават замяніць ласось варанай курыцай. Таксама атрымаецца смачна.

Для пірага спатрэбіцца:

Пясочнае цеста

250 гр мукі

125 гр масла

1 яйка

1-2 лыжкі халоднай вады

Начынка

200-250 гр шпінату (я выкарыстала марожаны, але можа быць і свежы)

100 гр сыру фета

150 гр вэнджанага ласося

3 яйкі

50 гр "жоўтага" сыру (тыпу галандскі)

330 мл вяршкоў 30%

молаты перац

Прыгатаванне:

1. Спачатку трэба зрабіць пясочнае цеста. Для гэтага халоднае масла з лядоўні парэзаць кубікамі, дадаць да мукі. 

2. Муку разам з маслам пачаць рэзаць нажом у місцы і перамешваць. Атрымаецца штосьці кшталту грубай стружкі. Потым размінаць цеста рукамі, пакуль кансістэнцыя не будзе больш-менш аднароднай. Розніца ў выглядзе цеста перад вымешваннем рукамі і пасля мае выглядаць прыкладна так:

3. Дадаць яйка і вымясіць цеста. Па меры патрэбы дадаць халодную ваду. Цеста мае быць гладкім і мягкім. 

4. Цеста загарнуць у харчовую плёнку і адправіць на 30 хвілін у лядоўню. 

5. Уключыць разагравацца духоўку на 170 градусаў. Натлусціць форму для выпечкі. Вынуць цеста, раскатаць і перакласці ў форму, разраўняць рукамі. Відэльцам зрабіць дзірачкі, каб падчас выпечкі не з'явіліся бурбалкі.

6. Я дадаткова выкарыстоўваю ў якасці цяжару падчас выпечкі сухія гарох з фасоляй (можна толькі гарох ці толькі фасолю). Некаторыя кажуць, што дастаткова і дзірачак, але мне больш падабаецца падвойнае забеспячэнне перад бурбалкамі, тады корж атрымліваецца раўнейшы. На цеста кладу кавалак паперы для выпечкі і туды насыпаю гарох з фасоляй. Для розных пірагоў выкарыстоўваю адну і тую ж, "дзяжурную" сумесь. 

7. Цеста ў форме (з гарохам ці без) адпраўляем у духоўку на 20 хвілін. Потым паперу з гарохам вымаем, а цеста яшчэ на 5 хвілін пакідаем у духоўцы. 

8. Пакуль корж пячэцца, рыхтуем складнікі для начынкі. Марожаны шпінат крыху пратушваем, адцэджваем з яго вадкасць. Старанна перамешваем у місцы вяршкі з яйкамі і молатым перцам. Не солім, бо фета і ласось салёныя. Таксама трэба парэзаць ці раскрышыць сыр фета, пацерці 50 грам "жоўтага" сыру, і раздзяліць на кавалачкі вэнджаную рыбу.

9. Калі корж спечаны, вымаем яго. Духоўку не выключаем, а павышаем тэмпературу да 180 градусаў. На каржы раскладаем шпінат, рыбу, сыр фета. Пасыпаем іншым сырам і заліваем сумессю вяршкоў і яек. 

9. Адпраўляем пірог у духоўку на 30 хвілін. Падаваць цёплым ці халодным.