Шашлыкі на патэльні-грыль

Экзатычнае спалучэнне курыцы і курагі

Пакуль за вакном лье дождж і сапраўдны грыль ці вогнішча пад акдрытым небам застаецца летняй марай, можна прыгатаваць шашлык у звычайнай кухні - на патэльні. А каб настрой зрабіць сапраўды летнім і адпачынкавым варта дадаць да стравы крыху экзатычны акцэнт - спалучыць мяса з садавіной. Я выбрала курагу, але такія ж шашлыкі можна прыгатаваць, напрыклад, з кавалачкамі свежага ананасу. Дарэчы, страву можна лічыць дыетычнай, калі канечне не сапсаваць яе цяжкім гарнірам.

Для шашлыкоў спатрэбіцца (на 8-9 штук):

падвойнае філе курыцы
200 гр курагі
сок з паловы лімона
аліўкавы алей
прыправы - куркума, молаты імбір, чырвоная папрыка (вэнджаная ці звычайная), сушаны маяран
соль, перац
шпажкі

Прыгатаванне:
1. Курынае філе парэзаць на даволі тонкія палосачкі каля 1-2 см.

2. Перакласці кавалкі філе ў міску, дадаць прыправы - соль, перац, куркума (0,5-1 лыжачка без горкі), імбір (0,5-1 лыжачка без горкі), папрыку паўлыжачкі і крыху маярану. З колькасцю прыправаў трэба арыентавацца па смаку. Дадаць 2 сталовыя лыжкі алею. Выціснуць сок з паловы лімона, але дадаваць порцыямі бо лімоны бываюць розныя. Лепш спрабаваць і дадаваць, патроху чым сапсаваць занадта вялікай колькасцю лімона. Курынае філе накрыць харчовай плёнкай і пакінуць марынавацца на гадзінку. 

3. На гэты ж час замачыць у цёплай вадзе курагу. 

3. Калі час пройдзе, нанізаць філе на шпажкі. Для гэтага кожную палосачку загарнуць у кшталце "слімака". Чаргаваць на шпажках філе і курагу. Паставіць разагравацца патэльню-грыль.

4. Падсмажыць шашлыкі на добра разагрэтай патэльні-грыль на сярэднім агні з абодвух бакоў. Увага - калі шашлыкі смажыць занадта доўга - мяса стане сухім. Таму важна не ператрымаць шашлыкі, але і каб яны не былі сырыя ў сярэдзіне. З гэтага пункту гледжання добра, калі палосачкі філе будуць тонкія. 

У меру смажаныя шашлыкі атрымліваюцца сакавітымі і далікатнымі, да іх нават непатрэбны ніякі соўс. Можна падаваць з любым гарнірам. У мяне на фота - капуста кале.