Безэ Pavlova

Бялковы торт са свежымі ягадамі без мукі

Лічыцца, што гэты дэсерт быў прыдуманы ў гонар балярыны Ганны Паўлавай, якая ў 20-х гадах мінулага стагоддзя гастралявала па Аўстраліі і Новай Зеландыі. Аднак чамусьці націск з прозвішча балярыны не перайшоў на назву торта і ён чытаецца як "ПаўлОва". Торт нескладаны ў прыгатаванні, але патрабуе некалькіх гадзінаў часу і добрай духоўкі, у якой можна дакладна выставціь тэмпературу. Торт-безэ трэба "сушыць" у духоўцы, каб ён захаваў белы, малочны колер і не стаў карычневы. Калі тэмпература выстаўлена правільна, торт атрымліваецца хрупкі звонку і з далікатнай пенкай усярэдзіне. Для кантрасту да салодкага безэ лепш дадаць нейкіх кіслых ягад ці садавіны (у мяне вішні), а спалучае гэта ўсё ў адно цэлае слой крэму з узбітых вяршкоў і маскарпонэ.

Складнікі:

150 мл халодных бялкоў з яек (гэта 4-5 яек у залежнасці ад памеру)

220 гр белага цукру 

(на 170 мл бялкоў трэба 250 гр цукру)

шчыпотка солі

1 лыжачка крухмалу

1 лыжачка белага віннага або рысавага воцату

Крэм:

125 гр маскарпонэ (можна і больш)

1-2 лыжкі ванільнага цукру

125 мл тлустых вяршкоў з лядоўні (30% тлушчу)

Свежыя ягады (ці размарожаныя)

Прыгатаванне:

1. Да бялкоў дадаць шчыпотку солі, добра ўзбіць міксерам на пену. Па лыжцы дадаваць цукар, кожны раз доўга і дакладна ўзбіваючы бялкі пасля кожнай дададзенай порцыі цукру. Пасля таго як увесь цукар будзе паволі дададзены да бялкоў, узбіваць яшчэ 3 хвіліны. 

2. Уключыць разагравацца духоўку да 120 градусаў (рэжым без тэрмавентылятара). 

3. Дадаць да бялкоў лыжачку крухмалу і лыжачку воцату, а пасля ўзбіваць яшчэ 2 хвіліны. У канцы мусіць атрымацца густая, бліскучая маса.

4. На паперы намаляваць кола патрэбнай велічыні, каб лягчэй было роўна выкласці бялкі (кола дыяметрам каля 22 см для 150 гр балякоў). Лапаткай выкласці масу на паперу для выпечкі. Лепш зрабіць гэта некалькімі вялікімі порцыямі, чым па лыжцы. Разраўняць масу, падняць угару бакі.

5. Адправіць у духоўку, разагрэтую да 120 градусаў на 30 хвілін. Потым зменшыць тэмпературу да 100 градусаў і пекчы яшчэ як мінімум 3 гадзіны. Можна зрабіць гэта ўвечары і тады пакінуць безэ састываць на ўсю ноч у паў-адкрытай выключанай духоўцы. Гатовы корж мае выглядаць прыкладна так:

6. Непасрэдна перад тым, як падаваць торт, зрабіць крэм. Для гэтага спачатку ўзбіць міксерам маскарпонэ (з лядоўні) з цукрам (2 хвіліны), потым дадаць тлустыя, халодныя вяршкі і ўзбіваць яшчэ 1-2 хвіліны, пакуль маса не стане густой. Увага! Калі крэм узбіваць занадта доўга, ён зноў стане вадкім, таму важна на вока вылавіць момант, калі трэба выключыць міксер.

7. Гатовы крэм выкласці на корж з безэ. Пасыпаць зверху ягадамі. Я выкарыстала вішні з маразілкі (якія папярэдне размарозіла). Упрыгожыць.

Рэцэпт з польскага кулінарнага блога.