Цыбулевы суп са скарынкай

З грэнкамі і сырам, запечаны ў духоўцы

Цыбулевы суп лічыцца стравай класічнай французскай кухні, а пачатак свой, нібыта, бярэ з кухні беднякоў, бо галоўны складнік стравы быў заўсёды даступны кожнаму сяляніну. Цыбулевы суп падаюць, здаецца, ў кожным французскім рэстаране і ў большасці рэстаранаў у самой Францыі, тым не менш, мой улюбёны Джэймі Олівер патрыятычна сцвярджае, што гэты суп можа паходзіць і з Велікабрытаніі, бо старыя кулінарныя брытанскія кнігі, якім па некалькі соцень гадоў, ужо распавядалі пра рэцэпт цыбулевага супа.

Чула я пра гэты суп шмат, аднак ніколі не спрабавала. Нядаўна наткнулася на рэцэпт менавіта ў кніжцы Олівера "Мае абеды" (якую мне ласкава пазычыў знаёмы, за што яму дзякуй) і вырашыла, што надыйшоў час, каб яго пакаштаваць. Паколькі арыгінальную версію я ніколі не ела, то адпаведна мне складана сказаць, наколькі добра ў мяне атрымаўся цыбулевы суп. Ягоны смак я магу апісаць як... цыбулевы. Нічога супер-пупер неверагоднага ў гэтай страве няма, аднак хрусткія грэнкі, скарыначка растопленага сыру і, канечне, чабор дадаюць ёй характару. Свежы чабор, дарэчы, я так і не знайшла, таму прыйшлося выкарыстаць сушаны ў выглядзе прыправы. У астатнім я трымалася рэцэпту Джэймі Олівера, якім і спяшаюся падзяліцца. 

Складнікі:

1 кг цыбулі

6 зубкоў часныку

жменька свежых лісткоў чабара ці сушаны чабор па смаку

лаўровыя лісткі

аліўкавы алей

2-3 ст. лыжкі масла

1 літр булёну

соль, перац

хлеб з пшанічнай мукі

каля 100 гр сыру, які плавіцца ў духоўцы

Прыгатаванне:

1. Часнык абраць і парэзаць на тонкія кавалачкі. Цыбулю абраць і таксама парэзаць на тонкія кавалачкі. 

2. У патэльні ці каструлі з тоўстым дном на малым агні абсмажыць цыбулю з часныком на аліўкавым алеі і масле. Дадаць чабор і лаўровыя лісткі. Аліўкавага алею шкадаваць не варта.

3. Потым прыкрыць усё накрыўкай і, час ад часу памешваючы, пратушыць на малым агні 15-20 хвілін, так каб цыбуля не засмажылася, а проста стала мягкай і ўвабрала ў сябе араматы прыправаў.

4. Зняць накрыўку, зрабіць большы агонь і крышачку падрумяніць цыбулю, але не моцна. 

5. Дадаць булён, зноў зменшыць агонь і гатаваць яшчэ 20 хвілін. Калі лічыце, што ў супе зашмат тлушчу, то на дадзеным этапе можна яго сабраць. Уключыць разагравацца духоўку да сярэдняй тэмпературы.

6. Прыправіць суп соллю і перцам. Пераліць у маленькія формы для выпечкі або ў адну вялікую. Наверсе выкласці кавалкі хлеба ці булкі. 

7. Пацерці сыр і пасыпаць суп з хлебам. Паліць невялікай колькасцю аліўкавага алею. 

8. Трымаць суп у духоўцы, пакуль грэнкі не падрумяняцца да патрэбнага вам стану, а сыр не расплавіцца і не пакрые суп смакавітай скарыначкай. 

Смачна есці!