SmakaVita: Шакаладны пірог з грэчкі

Яшчэ адзін спосаб незаўважна ўключыць кашу ў свой рацыён

Грэчку я не люблю з дзяцінства. Хтосьці з дзіцячага садка не сябруе з манкай, а я вось грэчку ўвогуле не пераносіла ў садку і школе і ніколі яе не ела. Ужо ў больш свядомым узросце, калі пачынаеш задумвацца над тым, што ясі, я вырашыла што грэчка ўсё ж карысная справа, аднак сваю да яе нелюбоў дагэтуль да канца я так і не перамагла. Магу з'есці грачаную кашу толькі з падлівай або ў нейкім перапрацаваным відзе. Менавіта таму маю ўвагу прыцягнуў гэты рэцэпт, які дазваляе "перамыціць" грэчку ў пірог такім чынам, што яе смак пачынае мне падабацца. Аўтар ідэі - польскі чэмпіён кандытарскіх спаборніцтваў Павел Малэцкі.

Пірог мае насычаны шакаладны смак (яно і нядзіўна, бо ў складзе сапраўдны горкі шакалад, а не какава ў парашку), у сярэдзіне ён застаецца вільготны і далікатны. Цікавы акцэнт таксама стварае салёны арахіс. Па-мойму чарговы эксперымент з такім незвычайным пірагом прайшоў паспяхова.

Для пірага спатрэбіцца:

180 гр грэчкі

5 яек

150 гр цукру

1 лыжка ванільнага цукру

120 гр звычайнай мукі

150 гр масла

150 гр горкага шакаладу

50 гр разынак

2 лыжачкі пякарскага парашку

25 гр салёнага арахісу

Шакаладная глазура

50 мл тлустых вяршкоў (напр. 30%)

100 гр горкага шакаладу

20 гр масла

Арахіс для ўпрыгожвання (каля 40 гр)

Прыгатаванне:

1. Зварыць грачаную кашу ў 400 мл вады пад крышкай на маленькім агні, прыкладна 20-25 хвілін. Астудзіць. Грэчку перамалоць блэндэрам або ў мясарубцы да больш-менш аднароднага стану.

2. У маленькай каструлі растапіць масла, дадаць туды кавалкі шакаладу, каб яны таксама растаялі. Мяшаць увесь час, пакуль маса не стане аданроднай.

3. Падрыхаваць форму для выпечкі, выкласці яе паперай, памазаць маслам. Разагрэць духоўку да 180 градусаў (з тэрмавентылятарам) і да 190-200 без яго.

4. У глыбокай місцы яйкі добра ўзбіць з цукрам і ванільным цукрам (я ўзбівала венчыкам).

5. Працягваючы ўзбіваць, дадаваць да яек шакаладна-масляную сумесь.

6. Дадаць туды ж перамолатую кашу, прасеяную муку і пякарскі парашок. Усё добра перамешваем.

7. Арахіс і разынкі крупна пасекчы нажом. Дадаць да цеста на пірог.

8. Выкласці цеста ў форму. Адправіць пірог у духоўку прыкладна на 40 хвілін. Правяраць гатоўнасць драўлянай часткай запалкі або зубачысткай. Гатовы пірог у мяне выглядаў так:

Аўтар раіць выраўняць паверхню пірага нажом, але я не зразала верх, так і пакінула. За кошт шакаладнай глазуры паверхня ўсё роўна выраўняецца.
9. Калі пірог будзе гатовы, вынуць яго і крыху астудзіць, каб не быў гарачы.
10. Шакаладная глазура. Загатаваць вяршкі. Дадаць да іх кавалкі шакаладу, мяшаць пакуль шакалад не растае. Дадаць масла, перамяшаць, пакуль глазура не стане аднароднай.
11. Паліць глазурай негарачы пірог, упрыгожыць арахісам. Смачна есці!