SmakaVita: Пірог з гарбуза

Гарбуз у спалучэнні з 2 відамі сыру

Звычайна стравы з гарбуза ў большасці з нас асацыююцца з дзіцячым харчаваннем ці чымсьці салодкім, аднак з яго можна прыгатавць столькі ўсялякіх смачнёнікаў, прычым як салодкіх, так і салёных ды пікантных, што гарбуз - тэма невычарпальная. Тым не менш, я асабіста не люблю рысавую кашу з гарбузом, не ведаю чаму, але яна мне не смакуе. За тое вось такі адкрыты пірог з гарбузом я гатую ўжо напэўна гады 4. Усім, хто яго спрабаваў, ён падабаўся і шмат хто ніколі б не здагадаўся, што ў сярэдзіне гарбуз, клаі б не сказалі. Таму дзялюся рэцэптам. Пірог добры яшчэ і тым, што дакладных прапорцый для начынкі можна не прытрымлівацца - я заўсёды даю складнікі "на вока" - крыху аднаго, крыху другога. Таму пададзеныя вартасці прыблізныя.

Складнікі:
Цеста
200 гр мукі
100 гр халоднага масла
ўзбітае яйка
1-2 лыжкі халоднай вады
лыжачка солі
молаты мускатны арэх

Начынка
600 гр гарбуза без насення (на пірог пайшла палова невялікага гарбуза)
120 гр жоўтага сыру які плавіцца
120 гр сыру фета
3 сталовыя лыжкі смятаны з горкай
2 яйкі
паўпучка свежай зеляніны (пятрушка або кроп)
соль, перац
молаты мускатны арэх

Прыгатаванне:
1. Робім пясочнае цеста. Халоднае масла рэжам кубікамі, дадаем да мукі. Дасыпаем шчыпотку мускатнага арэху. Сячэм масла разам з мукой у місцы, потым размінаем рукой да стану стружкі. Дадаем яйка, замешваем цеста. Калі занадта крохкае, можна дадаць крышачку халоднай вады. Калі занадта ліпне да рук, дадаць крышачку мукі. Загарнуць у харчовую плёнку і адправіць на паўгадзінкі ў лядоўню. (Падрабязней пра тое, як рабіць пясочнае цеста можна пачытаць і паглядзець фота тут).

2. Пакуль цеста адпачывае ў лядоўні, займаемся гарбузом. Абіраем яго ды рэжам кубікамі.
3. Адпраўляем гарбуз у каструлю, даліваем крышачку вады. Прыкрываем і пратушваем на сярэднім або малым агні, пакуль гарбуз не стане мягкім. Падчас тушэння дадаем мускатны арэх і молаты перац.

4. Калі гарбуз памякчэе, таўкачыкам да бульбы зрабіць з яго пюрэ. Крыху прысаліць. Калі ў гарбузе зашмат вадкасці, то проста яе зліць.

5. Духоўку разагрэць да 170-180 градусаў (без тэрмавентылятара).Вынуць цеста з лядоўні, раскатаць і перакласці ў форму. Пакласці зверху цяжар (фасоля або гарох) на паперы для выпечкі, каб цеста не паднімалася падчас выпечкі. Адправіць у духоўку на 15 хвілін, потым зняць цяжар і пекчы яшчэ 5-10хвілін, пакуль корж не будзе цалкам гатовы.

6. Тым часам зрабіць начынку. Жоўты сыр пацерці на тарцы, сыр фета парэзаць кубікамі. Пасекчы зеляніну. Перамяшаць гэта ўсё са смятанай і яйкамі.

7. Дадаць да сумесі пюрэ з гарбуза. Прыправіць па смаку соллю, перцам і молатым мускатным арэхам.
8. Калі корж будзе гатовы, выкласці на яго сумесь і адправіць у духоўку на 40 хвілін (пры той жа тэмпературы, што выпякаўся корж). Калі верхні край каржа атрымаўся не вельмі роўным, то перад тым, як выліваць на яго начынку, можна падраўняць яго вострым нажом.